غزه کې تر ویجاړیو لاندې ۱۱۷ جسدونه موندل شوي.
غزه کې د اوربند له ټینګښت او د اسراییلي پوځ د شاتګ په لومړیو ۴۸ ساعتونو کې، تر ویجاړو شویو ودانیو لاندې لږ تر لږه د ۱۱۷ فلسطینیانو مړي موندل شوي.
یوشمېر رسنیو د فلسطین روغتیايي چارواکو په خبره راپور ورکړی چې غزه کې د اوربند تامین د بېړنیو مرستندویه ځواکونو لپاره زمینه برابره کړې، څو هغه کسان را وباسي چې مخکې له دې د ودانیو او ویجاړو ودانیو لاندې په غزه کې ښخ شوي.
دا داسې مهال دی چې د غزې روغتیایي مسوولانو ویلي، تېرو څه باندې دوو کلونو کې د حماس او اسراییل ترمنځ جګړه کې ۶۷ زره او ۸۰۶ فلسطینیان وژل شوي او تر ۱۷۰ زره ډېر ټپیان دي.
همدارنګه لسګونه زره نور تر خاورو لاندې بند پاتې دي.
دې سره، ټاکل شوې نن دوشنبه د نړۍ له شلو د زیاتو هیوادونو مشران د مصر په «شرم الشیخ» کې هغه غونډه کې ګډون وکړي چې غزه کې د جګړې د پایته رسولو په موخه جوړیږي.
د دغې سرمشریزې موخه غزه کې د جګړې پایته رسول او منځني ختیځ کې د سولې او ثبات لپاره د هڅو پیاوړي کول دي.
