د اسراییلو پوځ د غزې خان یونس ښار بمبار کړی.
د اسراییلو پوځ یو ځل بیا د غزې پر بېلابېلو سیمو خپل بریدونه پیل کړي او تازه یې، د غزې اړوند خان یونس ښار بمبار کړی دی.
د اسراییل پوځ د تېرې شپې په اوږدو کې عملیات هم کړي چې هدف یې د «حماس» د غړیو په نښه کول و چې د رفح په ښار کې په زیرځمینی تونلونو کې بند پاتې دي.
اسراییل ادعا کوي چې په دې عملیاتو کې د حماس شپږ غړي وژل شوي او پنځه نور نیول شوي دي.
اسراییل مخکې له دې چې دویمه مرحله د اوربند موافقې ته ورسیږي، هڅه کوي هغه کسان چې د حماس پورې تړاو لري او د رفح او نورو سیمو په تونلونو کې بند پاتې دي، هدف وګرځوي.
د حماس لسګونه غړي لاهم د رفح ښار لاندې تونلونو کې کلابند دي او اسراییل د دوی د وتلو هر ډول وړاندیز رد کړی دی.
اسراییل همدارنګه خپل نظامي شتون په غزه کې پراخ کړی او د «زېړې کرښې» له حده چې د توافق له مخې، باید شا ته تللی وو، تېر شوی دی.
