د یمن په پلازمېنه صنعاء کې د حوثي ډلې تر کنټرول لاندې ځانګړې جزايي محکمې ۱۷ کسانو ته د جاسوسۍ په تور د اعدام حکم ورکړی دی.

 د حوثي اړوند رسنیو په وینا، محکوم شوي کسان د هغو «جاسوسۍ» غړي بلل شوي چې ادعا کېږي له امریکايي، اسراییلي او سعودي استخباراتو سره یې اړیکې لرلې.

د محکمې د اعلامیې له مخې، یادو کسانو د نظامي معلوماتو راټولول، د امنیتي تاسیساتو موقعیتونه شریکول او د یمن دننه د «دښمن هېوادونو د عملیاتو» ته اسانتیاوې برابرولې. د محکمې چارواکو ویلي چې نیول شوي کسان د اوږدو پلټنو وروسته محکمې ته سپارل شوي وو.

حوثي چارواکو دعوه کړې چې د نیول شویو کسانو شبکه د یوې داسې استخباراتي کړۍ برخه وه چې هدف یې په یمن کې د بهرنیو هېوادونو ګټې پیاوړې کول او د حوثي ځواکونو عملیات ګډوډول وو. هغوی وايي چې دغه کسان په بېلابېلو ولایتونو کې د امنیتي څار عملیاتو پرمهال نیول شوي دي.

بل‌خوا نړیوالو بشري سازمانونو په تکرار سره ویلي چې په یمن کې د جګړې له پیلېدو وروسته ترسره کېدونکې محاکمې ډېری وخت د نړیوالو قانوني معیارونو پر بنسټ نه‌وي.

د هغوی په خبره، ځینې بندیان له جبري اعترافونو، محدودو حقوقي خدمتونو او نامعلومو توقیفي میاشتو سره مخ وي. حوثي ډلې بیا دا تورونه ردوي او وایي چې محاکمې یې قانوني، روښانه او د امنیت د ساتنې لپاره اړینې دي.

تر اوسه د اعدام د حکمونو په اړه د محکوم شویو کورنیو یا نړیوالو ادارو رسمي غبرګون نه‌دی خپور شوی.