د لوګر په درېیو ولسوالیو کې اوو ښوونځيو ته نوې ودانۍ جوړې شوې.
د لوګر د پوهنې ریاست وایي چې د ملګرو ملتونو د ماشومانو د ملاتړ صندوق(UNICEF) له لوري د دغه ولایت په درېیو ولسوالیو کې د شاوخوا ۷۵ میلیونه افغانیو په لګښت اوو ښوونځیو ته ودانۍ جوړې او ګټې اخيستنې ته وسپارل شوې.
د لوګر د پوهنې رئيس مولوي عبدالرحمن حمیدي په دې اړه جوړ شوو مراسمو ته وویل چې د دغه ولایت په برهبرک، څرخ او خروار ولسوالیو کې اوو لومړنیو ښوونځيو ته ودانۍ جوړې شوې چې هره ودانۍ د نورو اړینو ملحقاتو ترڅنګ ۶ درسي ټولګي، احاطوي دېوالونه، د پاکو اوبو او سولري سیسټمونه لري.
حمیدي زیاته کړه چې د دغو ودانیو له پرانېستل کېدو سره د شاوخوا ۲۱۰۰ زدهکوونکو لپاره د زدهکړو مناسب چاپېریال برابر شو.
بلخوا، د لوګر د مرکز پلعلم یوه اوسېدونکي عبدالله رسنیو ته وویل، خوښ دی چې د ملګرو ملتونو د ماشومانو د ملاتړ صندوق(UNICEF) له لوري اوو ښوونځیو ته معیاري ودانۍ جوړې شوې.
هغه ټینګار کوي چې د لوګر په مرکز پلعلم او یو شمېر نورو لرو پرتو ولسوالیو کې دې هم هغو ښوونځیو ته ودانۍ جوړې شي چې اوس یې زدهکوونکي په ستونزو کې زدهکړې کوي.
د یادونې ده، دوه میاشتې مخکې هم د ملګرو ملتونو د ماشومانو د ملاتړ صندوق(UNICEF) د لوګر په مرکز پلعلم او یو شمېر لرو پرتو ولسوالیو کې اوو ښوونځيو ته ورته معیاري ودانۍ جوړې کړې وې.
