د لوګر د برېښنا ریاست مسوولین وايي چې د دغه ولایت د مرکز پلعلم اړوند شپږو کلیو ته د برېښنا رسولو یوې پروژې چارې پیل شوې چې له بشپړېدو سره به یې شاوخوا ۲۶۰۰ کورنۍ له وارداتي او دوامداره برېښنا برخمنې شي.
د لوګر د برېښنا رييس میر احمدولي هاشمي د یادې پروژې د پیل مراسمو ته وویل چې پر دې پروژه څه باندې ۳۵ میلیون افغانۍ لګښت راځي او په ترڅ کې به یې لس نوي ترانسفرمرونه ولګول شي.
د نوموړي په وینا، د پروژې عملي چارې به د راتلونکو شپږو میاشتو په موده کې بشپړې شي.
هاشمي زیاته کړه چې د پروژې ټول مالي لګښت د افغانستان د برېښنا شرکت پر غاړه دی او له بشپړېدو وروسته به د راهخوشي، ملایانو، کمالخېلو، جمالخېلو، عیاض ستيکوټ او د باري دښتې اوسېدونکي له وارداتې برېښنا برخمن شي
د لوګر مرستیال والي مولوي محمدانور دینپرور دغه پروژه د یادو کلیو لپاره یو مهم پرمختګ وباله او له خلکو یې وغوښتل چې د برېښنا له بېځایه مصرفه ډډه وکړي او د اسلامي امارت له روانو رغنیزو پروګرامونو سره خپله همکاري لا پیاوړې کړي.
د سیمې اوسېدونکو د پروژې د چارو د پیل هرکلی وکړ او دا یې له کلونو انتظار وروسته یو ستر پرمختګ وباله. هغوی دغهراز مسوولینو ته ډاډ ورکړ چې د پروژې په عملي چارو کې به هر ډول لازمه همکاري وکړي.
د یادونې ده، په دې پروژه کې د یادو شپږو کلیو د برېښنا شبکې د ایجاد ترڅنګ د ترانسفرمرونو، مزو او اړینو تخنیکي تاسیساتو لګول او غځول هم شامل دي.
