د بدخشان ولایت ځایي چارواکي وايي، چې د دغه ولایت په راغستان، خاش او تیشکان ولسوالیو کې سېلابونو ډېر مالي او ځاني زیانونه اړولي دي.
د ځایي مسوولینو په خبره د راغستان ولسوالۍ په خاشم کلی کې سېلاب د یوه کس ژوند اخیستی دی. مسوولین وایي، د دغه سېلاب له امله د بدخشان په درېيو ولسوالیو کې لسګونه کورونه، سلګونه جریبه کرنیزه ځمکه او د ځایي اوسېدونکو بڼوڼه له منځه تللي دي.
د یاد ولایت ځایي چارواکو دا نه دي ویلي چې په بدخشان کې په ټوله کې راوتلو سېلابونو څومره زیان اړولی دی. د یادونې وړ ده چې تر دې وړاندې هم په بدخشان کې سېلابونو خلکو ته ځاني تلفات او درانه مالي زیانونه اړولي وو.
