لوګر کې د پنګرام لوبډلې د فوټسال سیالیو اتلولي وګټله.
د لوګر د چرخ ولسوالي د «خزان» جام د فوټسال سیالیو پایلوبه د پنګرام چرخ لوبډلې په اتلولۍ سره پای ته ورسېده.
د لوګر د بدني روزنې او ورزش امریت امر انجینیر مزمل نعیمزي زینت رادیو ته وویل، یادې سیالي د ۲۰ لوبډلو په ګډون د لوګر د فوټسال کمېټې لهخوا د یاد ولایت د المپیک، بدني روزنې او ورزش امریت په همکاري ترسره شوې چې ۱۵ ورځې یې دوام درلود.
نوموړي زیاته کړه، د دغو سیالیو وروستۍ لوبه د اتحاد چرخ او پنګرام چرخ لوبډلو ترمنځ ترسره شوه چې په پایله کې پنګرام چرخ لوبډلې وتوانېده د ۴ – ۱ په پایلې سره سیالي وګټي او د یادو سیالیو د اتلولۍ مقام خپل کړي.
د نعیمزي په وینا، د سیالیو په پای کې د لوګر د المپیک، بدني روزنې او ورزش آمریت لهخوا اتلې لوبډلې ته ستاینلیکونه، مډالونه او د اتلولۍ جام ورکړل شول.
هغه وویل، د دغو سیالیو موخه د ځوانانو ترمنځ د یووالي، همغږۍ او ورورولۍ پیاوړتیا، په لوګر ولایت کې د فوټسال ورزش وده او پرمختګ، او د نشهیي توکو پر وړاندې مبارزه ده.
