کرنې وزارت: هلمند کې ۲۱۳ جریبه ځمکه باندې د انارو باغونه جوړېږي.
هلمند کې د کرنې، اوبولګولو او مالدارۍ وزارت د ۱۲.۵ میلیونه افغانیو په لګښت د یوې سترې پراختیايي پروژې په لړ کې د ۲۱۳ بزګرانو لپاره د انارو د نويو باغونو جوړولو چارې پیل کړې چې موخه یې د بڼوالۍ معیاري کول، د اوبو سپما او د بزګرانو د تولیداتو لوړول دي.
د دغه پروګرام د پرانستې مراسم د هلمند په مرکز لښکرګاه کې نیول شوي چې پهکې د کرنې وزارت د اطلاعاتو رییس مولوي شېرمحمد حاتمي، د هلمند د کرنې رییس مولوي نیازمحمد وهاج، د کرنیزو چارو امر قاري مولوي مطیعالله عابد، د طبیعي منابعو امر محمدحسن محتاج او یوشمېر نورو مسوولانو ګډون کړی وو.
مولوي شېرمحمد حاتمي د پرانستې پرمهال وویل: «د انارو دا پروژه به نه یوازې د بزګرانو عواید زیات کړي، بلکې د اوبو د قطرهیي سیستم له لارې به د اوبو په مصرف کې هم د پام وړ سپما رامنځته کړي.»
د کرنې ریاست چارواکو په وینا، دغه پروژه چې د وزارت د پراختیايي بودیجې له لارې تمویلېږي، ۱۲.۵ میلیونه افغانۍ لګښت پرې راځي او په ۲۱۳ جریبه ځمکه کې به د انارو باغونه د عصري او مسلکي تخنیکونو په مرسته جوړ شي.
دغه باغونه به د لښکرګاه، کجکي، خانشین، موسی قلعه او نهرسراج په ولسوالیو کې جوړېږي.
د هلمند د کرنې رییس مولوي نیازمحمد وهاج وویل: «دا پروژه د بدیل معیشت برنامې له لارې د وزارت د مقام په منظورۍ پیل شوې، څو بزګرانو ته د اقتصادي پیاوړتیا او دوامدارې ودې زمینه برابره کړي.»
ځايي بزګران دیادو باغونو جوړېدو ته خوښ دي. یو تن بزګر محمد یونس وویل: «انار د هلمند د اقلیم سره ډېر مناسب دی، لږې اوبه غواړي او ګټه یې ډېره ده.»
بل کروندګر شبیر هم ورته نظر لري او وایي: «موږ هیلهمن یو چې دغه پروژه به زموږ د کار کیفیت او عاید دواړه لوړ کړي.»
هلمند د افغانستان له هغو ولایتونو څخه دی چې د انارو بڼوالي لپاره مناسب اقلیم لري. په وروستیو کلونو کې د کرنې وزارت هڅه کړې چې د بدیل معیشت په موخه د انارو، انګورو او نورو میوهدارو ونو کرنه نوره هم پراخه کړي.
د کرنې ریاست چارواکي وایي، د قطرهیي سیستم په مرسته د اوبو د مصرف کچه تر ۵۰ سلنې پورې راکمولی شي، او د نوي باغونو تولید به د صادراتو په برخه کې د افغانستان اقتصاد ته مثبت اغېز ورسوي.
