د صنعت او سوداګرۍ وزیر نورالدین عزیزي د ترکیې په استانبول کې د اقتصادي همکاریو سازمان «ایکو» د وزیرانو په پنځمه غونډه کې ویلي چې افغانستان د سوداګرۍ او ټرانزیټي پروژو کې د لافعالې همکارۍ لپاره بشپړ چمتو دی.

د صنعت او سوداګرۍ وزارت مسوولان وايي چې د یادې غونډې په ترڅ کې عزیزي افغانستان کې د سوداګرۍ د پراختیا د ټرانزيټ د اسانتیا او د بهرنیو پانګونو د جلبولو په برخه کې د ایکو سازمان د غړو هېوادونو ملاتړ ترلاسه کړی دی.

د دغه وزارت ویاند، اخوندزاده عبدالسلام جواد وویل چې د افغانستان د سوداګرۍ او صنعت د پراختیا لپاره د ایکو سازمان د غړو هېوادونو ملاتړ به د هېواد د اقتصادي ودې او د سیمه‌ییزې همکارۍ د پیاوړتیا لپاره یو مهم فکتور وي.

هغه وویل: «په دې ناستې کې د صنعت او تجارت وزیر د وینا په ترڅ کې د افغانستان جغرافیايي موقعیت او د سیمې د مهم ترانزیتي څلورلارې رول تشریح کړ. هغه ټینګار وکړ چې افغانستان د سوداګریزو او ترانزیتي پروژو په برخه کې د لا ډېر فعال ګډون لپاره بشپړه چمتووالی لري. د غونډې په جریان کې افغانستان د غړو هېوادونو ملاتړ هم جلب کړ، څو د سوداګرۍ وده، د ترانزیت د اسانتیاوو پراختیا او د بهرنیو پانګونو راجلبول نوره هم پیاوړي شي.»

د اقتصادي همکاریو سازمان د وزیرانو د غونډې په څنډه کې د صنعت او سوداګرۍ وزیر نورالدین عزیزي د ترکیې او ایران د سوداګرۍ له وزیرانو سره هم کتلي او د سوداګرۍ د پراختیا په اړه یې خبرې کړې دي.

سلام‌وطندار پر اېکسپاڼه هم وڅارئ

د سلام‌وطندار پښتو فېسبوک‌پاڼه وڅارئ

د صنعت او سوداګرۍ وزارت ویاند اخندزاده عبداسلام جواد په دې اړه وویل: «په دې لیدنه کې، د صنعت او تجارت وزیر په افغانستان کې د ترکي شرکتونو او بنسټونو د لاډېرو پانګونو د جلبولو پر اړتیا ټینګار وکړ. د ترکیې لوري هم څرګنده کړه چې یوشمېر ترک تجارتي موسسو خپل استازي دفترونه په کابل کې پرانیستي دي چې دا د دوی د لېوالتیا څرګندونه کوي، څو خپلې همکارۍ پراخې کړي او پانګه افغانستان ته انتقال کړي.»

د اقتصادي چارو کارپوهان د ایکو سازمان غونډه او د ترکیې او د سیمې له ځینو نورو هیوادونو سره د افغانستان د سوداګریزو اړیکو پراختیا، د نویو بازارونو او پانګوالو د موندلو او د افغانستان د اقتصادي انزوا څخه د خلاصون لپاره یو ښه فرصت بولي.

د چاروکارپوه عبدالظهور مدبر وویل: «دا ناسته په افغانستان کې د ترانزیټي او ټرانسپورتي بنسټونو د پراختیا لامل هم کېدای شي؛ ځکه د ایکو ډېری پروژې د غړو هېوادونو د نښلېدو اړتیا لري چې دا چاره د افغانستان په ګټه تمامېږي.
افغانستان کولای شي له دې فرصته په استفادې، تعرفې او اسانتیاوې راکمې کړي، دوه‌اړخیز او څو اړخیز توافقونه اسانه کړي او د خپلو صادراتو لپاره نوي بازارونه پیدا کړ، په ځانګړي ډول د کرنیزو محصولاتو لپاره.»

د یادونې ده چې د اقتصادي همکاریو سازمان «ایکو» پنځمه غونډه د نومبر په ۲۴مه پیل او د نومبر په ۲۶مه پای ته ورسېده.