لوګر کې له ۱۰۰۰ راستنېدونکو کورنیو سره د خوراکي توکو مرسته وشوه .
په لوګر ولایت کې له زرو راستنېدونکو او کډوالو کورنیو سره د یوې خیریه موسسې له لوري د شاوخوا اته میلیونه افغانیو په ارزښت د خوراکي توکو مرسته وشوه.
د لوګر د کډوالو او بېرته راستنېدونکو چارو ادارې د معلوماتو له مخې، دغه مرسته د کډوالو او بېرته راستنېدونکو چارو وزارت په همغږۍ او د یوې خیریه موسسې په مالي ملاتړ چمتو شوې او د ځايي مسوولینو په شتون کې پر زرو اړمنو کورنیو ووېشل شوه.
د لوګر د کډوالو او بېرته راستنېدونکو چارو امریت امر، مولوي محمد مسعود اخندزاده، وايي چې د مرستو په هره بسته کې شپږ ډوله خوراکي توکي شامل دي او هرې کورنۍ ته د شاوخوا اته زره افغانیو په ارزښت توکي ورکړل شوي دي.
په همدې حال کې، د لوګر مرستیال والي مولوي انعامالله صلاحالدین د راستنېدونکو کورنیو د لومړنیو اړتیاوو د پوره کولو لپاره د ورته مرستو برابرول مهم وبلل او له مرستندویه بنسټونو یې وغوښتل چې له دغو کورنیو سره خپلو مرستو ته دوام ورکړي.
له مرستو برخمنو کورنیو د دغې مرستې هرکلی وکړ او له نورو مرستندویه بنسټونو یې هم وغوښتل چې د راستنېدونکو او اړمنو کورنیو د ملاتړ لپاره ورته مرستې برابرې کړي.
د کډوالو او بېرته راستنېدونکو چارو ادارې د معلوماتو له مخې، د کډوالو د بېرته راستنېدو د روان بهیر له پیل راهیسې شاوخوا ۱۶ زره او ۵۰۰ کورنۍ لوګر ولایت ته راستنې شوې دي.
