لوګر کې ۷ ښوونځیو ته نوې ودانۍ جوړې شوي.
د لوګر پوهنې ریاست مسوولان وایي چې د ملګروملتونو ماشومانو ملاتړ صندویق(UNICEF) له لوري د ۷۵ میلیونه افغانیو په ارزښت په درېوو ولسوالیو کې اووه ښوونځیو ته نوې ودانې جوړې شوي دي.
د دغه ولایت پوهنې ریاست ویاند شاه پور عرب زینت راډیو ته وویل: «دا ښوونځي د پوهنې وزارت له لوري د یونېسف په مالي ملاتړ ټولټال ۷۵ میلیونو افغانیو په لګښت د یوه کال په موده کې په پاخه او اساسي ډول په یوه پوړ کې جوړ شوي دي.»
د نوموړي په وینا، هر جوړ شوی ښوونځی یې یوه اداري خونه، ۶ تدریسي خونې، د لاسمنځلو ځانګړي ځایونه، د احاطې دیوالونه، د پاکو اوبو ژورې څاهګانې، د لمریزې برښنا او پاکو اوبو رسولو منظم سیستمونه او ۵ غرفې تشنابونه شامل دي.
عرب زیاتوي، په جوړو شویو ښوونځیو کې په برهکيبرک ولسوالي کې د پادخواب روغني هلکانو او د برکي راجان نجونو لېسو، په څرخ ولسوالي کې د ګرمابه نجونو ښوونځي او په خروار ولسوالي کې د محمدي، حاجي بزرګ، شمشېر ګوټکي او شیخ موسٰی لومړنیو ښوونځیو ودانۍ شاملې دي چې په پرانېستو سره به یې شاوخوا ۲زره او ۵۰۰ زدهکوونکو لپاره مناسب ښوونیز چاپېریال برابر شي.
بلخوا د لوګر اوسېدونکي هم خوښ دي چې د دغه ولایت په لروپرتو ولسوالیو کې ۷ ښوونځيو ته ودانۍ جوړې شوې، خو ټینګار کوي چې د لوګر په مرکز پلعلم او یوشمېر نورو ولسوالیو کې هم لسګونه ښوونځي ودانۍ نهلري او زدهکوونکي یي له پراخو ستونزو سره سره په لیکلوست بوخت دي.
