په افغانستان کې د اروپايي ټولنې شارژدافیرې ویرونیکا بوسکوویچ پوهار پرون خوست ولایت ته د خپل سفر په ترڅ کې د یاد ولایت له والي سره په کتنه کې د عامې روغتیا ریاست د لابراتوار له څانګې سره د ۷ میلیونه يورو مرسته کړې ده.
نوموړې ژمنه کړې، چې د همدې برخې د پیاوړتیا لپاره به په نږدې راتلونکي کې همدومره نورې مرستې هم وکړي. هغې د بې ځایه شویو او له نورو هېوادونو د راستنېدونکو افغانانو ستونزو ته په اشارې سره وویل، اروپایي ټولنه به د راستنېدونکو کډوالو د اړتیاوو د پوره کولو او هغوی ته د اساسي خدمتونو د وړاندې کولو په برخو کې خپلو مرستو ته دوام ورکړي.
