د هرات اوسېدونکو د دغه ولایت پوهنې ریاست ته اووه جریب ځمکه ورکړه. د پوهنې ریاست مسوولان وايي چې دا ځمکه شاوخوا ۳۵۰زره افغانۍ ارزښت لري چې د عامو خلکو له لوري یادې ادارې ته ورکړل شوې ده.

د هرات د پوهنې رییس رحمت‌الله جابر وایي چې یاده ځمکه د رباط‌سنگي او زیرکوه ولسوالیو کې موقعیت لري.

نوموړي زیاته کړه چې د خلکو همکاري او د پوهنې په چارو کې ونډه، د هغوی د ښوونې او روزنې د ودې لپاره د ژمنتیا څرګندونه ده.

د پوهنې ریاست چارواکي هیله‌مندي ښيي چې د خلکو دغه ډول ملاتړ به د هرات په ښوونیز نظام کې د کیفیت د ښه‌والي لامل شي.

له دې وړاندې هم دغه ولایت او د هېواد په نورو ولایتونو کې هم عامو خلکو د ښوونځي، جومات او نورو عامه ځایونو جوړولو لپاره ځمکې ځانګړې کړې دي.