ایران: د اسلامي امارت او پاکستان ترمنځ د اختلاف کمولو لپاره چمتو یوو.
ایران اعلان کړی چې د افغانستان اسلامي امارت او پاکستان ترمنځ د زیاتېدونکو ترینګلتیاوو په کمولو کې د هر ډول هڅې او ابتکار لپاره چمتو دی.
کابل کې د ایران سفارت نن (یکشنبه، د لیندۍ ۹مه/ د نومبر ۳۰مه) د دغه هېواد د ملي امنیت شورا د مشر علي لاریجاني له قوله پر ایکسپاڼه لیکلي چې تهران د دواړو لورو د اختلافاتو د حل لپاره د منځګړتوب او هڅو بشپړ چمتووالی لري.
د اسلامي امارت او پاکستان ترمنځ اړیکې هغه وخت ترینګلې شوې چې پاکستان د تلې په میاشت کې د کابل او پکتیکا ځینې سیمې بمبار کړې.
د افغانستان د ملي دفاع وزارت د پاکستان بریدونو ته ډیورنډ کرښې ته څېرمه سیمو کې ځواب ورکړ چې په پایله کې یې د دواړو لوریو ترمنځ سختې نښتې رامنځته شوې.
تر دې وړاندې په قطر او ترکیه کې درې پړاوه خبرې شوې وې، خو د درېیم پړاو خبرې هم بېپایلې پای ته ورسېدې.
په وروستي ځل د لیندۍ ۴مه پاکستان د خوست، کونړ او پکتیکا پر ولایتونو هوايي بریدونه وکړل چې د اسلامي امارت د ویاند ذبیحالله مجاهد په وینا، دې بریدونو کې لس کسان شهیدان شوي او یوشمېر نور ټپیان شوي وو.
اسلامي امارت د یادو بریدونو په غبرګون کې د یوې رسمي خبرپاڼې په خپرولو سره ویلي چې د دې بریدونو ځواب به په “مناسب وخت” کې ورکړي.
