سعودي عربستان په امریکا کې یو تریلیون ډالر پانګونه کوي.
د سعودي عربستان ولیعهد، محمدبن سلمان، واشنګټن ته د سفر پرمهال اعلان کړی چې هېواد یې په امریکا کې تر یو ټریلیون ډالرو پانګونه کوي.
د رویټرز خبري اژانس د راپور له مخې، د سعودي پانګونه په امریکا کې د ریاض د اقتصادي اړیکو د پراختیا هڅه ده او دا ګام د سعودي او امریکا ترمنځ د اقتصادي همکاریو د لاپیاوړتیا لپاره اخیستل شوی دی.
محمد بن سلمان مخکې له دې ژمنه کړې وه چې ۶۰۰ میلیارده ډالر به په امریکا کې پانګونه وکړي، خو اوس د وضعیت د بدلون او د دواړو هېوادونو ترمنځ د اقتصادي اړیکو د پراخوالي په ترڅ کې، د سعودي ولیعهد دغه شمېر دوه برابره کړی دی.
تر اوسه هېڅ ټاکل شوې نېټه د دې پانګونې د پوره کولو لپاره نهده څرګنده شوې.
د سعودي ولیعهد د یاد سفر په ترڅ کې له امریکا سره د ۲۷۰ میلیارده ډالرو په ارزښت د سوداګریزو او ټکنالوژیکو تړونونو لاسلیکونه هم کړي دي.
دغه تازه اقتصادي همکاري په داسې حال کې کېږي چې محمدبن سلمان له اوو کلونو وروسته بیا امریکا ته سفر کړی دی. وروستی سفر یې په ۲۰۱۸ میلادي کال کې کړی و چې په هغه کال کې د جمال خاشقجي، د سعودي منتقد، وژنه د سعودي او امریکا ترمنځ اړیکې کړکېچن کړې وې.
که څه هم بن سلمان د قتل امر ورکول رد کړي، خو هغه ومنله چې د هېواد د رهبر په توګه یې په دې پېښه کې وروستی مسؤولیت پر غاړه دی.
