ټرمپ: اوکراین دې تر پنجشنې د سولې طرحه ومني.
د امریکا ولسمشر ډونالد ټرمپ ټینګار کړی چې اوکراین باید د پنجشنبې د ورځې مخکې د امریکا د سولې طرحه ومني چې د هغه په وینا، د جګړې د ختمولو لپاره مناسبه موده ده.
ټرمپ پرون جمعه، نومبر ۲۱مه، فاکس نیوز سره په مرکه کې وویل، که اوکراین خپل پوځي عملیات روان وساتي، د دونباس پاتې سیمې به له لاسه ورکړي او ټاکل شوې موده د سولې لپاره مناسبه ده.
ټرمپ زیاته کړه چې د روسیې ولسمشر ولادېمیر پوتین غواړي نورې جګړې ونهکړي او که روسیه د بالتیک سیمو پر وړاندې اقدام وکړي، هغه به وتوانیږي چې د پوتین مخه ونیسي.
ټرمپ همدارنګه د لبنان د حزبالله د وضعیت په اړه وویل چې د هغه حکومت د منځني ختیځ پر وړاندې د ایران نفوذ کم کړی او دا د ایران سره د احتمالي توافق زمینه برابروي.
مخکې له دې، د اوکراین ولسمشر ولودېمیر زېلېنسکي خبرداری ورکړی و، که د امریکا طرحه رد شي، هېواد یې ممکن د متحده ایالاتو ملاتړ له لاسه ورکړي.
زېلېنسکي وویل چې اوکراین د «کرامت له لاسه ورکولو یا د اصلي شریک د له لاسه ورکولو» سخت انتخاب سره مخ دی.
په ورته مهال د روسیې ولسمشر ولادېمیر پوتین ویلي چې مسکو له او کراین سره د واشنګټن د سولې لپاره طرحه ترلاسه کړې او زیاته یې کړه چې د امریکا طرحه کولی شي د وروستي حل لپاره بنسټ برابر کړي.
پوتین اشاره کړې چې امریکا د خپلې سولې د طرحې ګټه، روسیې سره نه ده شریکه کړې. په همدې حال کې، هغه ټینګار وکړ چې روسیه د سولهییز حل لپاره چمتو ده، خو د امریکا د طرحې جزئیات باید وڅېړل شي.
