د پېښو پر وړاندې د مبارزې او چمتووالي ملي ادارې لوی رئیس، ملا نورالدین «ترابي»، د خپل کاري پلاوي په ملتیا د لوګر ولایت د محمدآغې ولسوالۍ له سېلاب‌ځپلو سیمو څخه لیدنه وکړه او ډاډ یې ورکړ چې د زیانمنو کورنیو د لاسنیوي، د لارو د پاکولو او د زیانونو د جبران لپاره به لازم اقدامات ترسره شي.

په دې سفر کې د ملي ادارې د بېړنیو عملیاتو د مرکز رئیس، ملا سیداحمد «عثماني»، د محمدآغې ولسوالۍ ولسوال، مولوي محمددیدان «صابر»، د لوګر ولایت د پېښو پر وړاندې د چمتووالي رئیس، قاري نورالله «محمود»، او یو شمېر نورو سیمه‌ییزو مسؤلینو هم ګډون درلود.

پلاوي د محمدآغې ولسوالۍ د زاهدآباد، ګمران، شیرازه، دشتک، سفیدسنګ او د مس عینک کان اړوند سېلاب‌ځپلې سیمې له نږدې وکتلې.

د مسؤلینو په وینا، وروستیو سختو سېلابونو په دغو سیمو کې استوګنیزو کورونو، سړکونو، عامه زیربناوو او کرنیزو سیمو ته درانه مالي زیانونه اړولي او د خلکو ورځنی ژوند یې له ستونزو سره مخ کړی دی.

د لیدنې پر مهال ملا نورالدین «ترابي» وویل، د سېلابونو له امله زیانمن شوي سړکونه، لارې او خوړونه به د سکاوټرونو او نورو درنو ماشینونو په وسیله پاک شي، ترڅو د خلکو د تګ راتګ ستونزې هوارې او په اغېزمنو سیمو کې عادي وضعیت بېرته ټینګ شي.

نوموړي زیاته کړه، د پېښو پر وړاندې د مبارزې او چمتووالي ملي اداره به د اړوندو دولتي ادارو، مرستندویه بنسټونو او خیریه موسسو په همغږۍ د سېلاب‌ځپلو کورنیو د بېړني لاسنیوي، د بشري مرستو د رسولو او د زیانونو د کمولو لپاره خپلو هڅو ته دوام ورکړي.

د محمدآغې ولسوالۍ د وروستیو سېلابونو له امله ګڼ استوګنیز کورونه، کرنیزې ځمکې، سړکونه او عامه تاسیسات زیانمن شوي، چې له امله یې لسګونه کورنۍ له جدي ستونزو سره مخ شوې دي.