د لوګر د کرنې او مالدارۍ ریاست مسوولان وايي، سږکال په دغه ولایت کې د پیازو په تولید کې د پام وړ زیاتوالی راغلی او حاصلات یې د تېرکال په پرتله نږدې ۳۰۰ مټریک ټنه لوړ شوي دي.

د دغه ولایت د کرنې ریاست د عوایدو د تنظیم امر قاري عبدالبصیر شاهد زینت راډیو ته وویل چې سږکال د لوګر په کچه پر ۱۲۳۹ هکټاره ځمکه پیاز کرل شوي چې ۴۳،۳۴۷.۵ مټریک ټنه تولید ترې ترلاسه شوی او دا شمېر د تېرکال د تولیداتو په پرتله د پام وړ زیاتوالی ښيي.

نوموړي د حاصلاتو د زیاتېدو لاملونه د بزګرانو لپاره د عامه پوهاوي برنامو پلي کېدل، د اصلاح شويو تخمونو او سرو وېشل، او په ولایت کې د ډاډمنې امنیتي فضا شتون یاد کړ.

د کرنې ریاست د معلوماتو له مخې، تېر کال په لوګر کې په ۱۲۳۰ هکټاره ځمکه پیاز کرل شوي وو، چې له امله یې ټولټال ۴۳،۰۵۰ مټریک ټنه حاصلات ترلاسه شوي وو.

هغه زیاتوي چې په لوګر کې نه یوازې د پیازو په تولید کې پرمختګ شوی، بلکې سږ کال د غنمو، مڼو، لوبیا او هنډوانې په حاصلاتو کې هم د پام وړ زیاتوالی ثبت شوی دی.

د نوموړي په خبره، دغه زیاتوالی د کرنیزو فعالیتونو د ښه مدیریت، اصلاح شويو تګلارو او د بزګرانو د هڅونې پایله بلل کېږي.

بل‌خوا د لوګر د مرکز پل علم او ولسوالیو کروندګر هم مني چې سږ کال د پیازو حاصلات لوړ شوې دي خو زیاتوي چې د بازار نشتون له امله یومن پياز په ۵۰ افغانۍ پلورل کیږي چې د بزګرانو لګښتونه هم نشي پوره کولای.