د لوګر محلي مسوولان وايي چې د دغه ولایت په ټولو ولسوالیو کې د معیاري ترانسپورتي ترمینلونو د جوړولو په موخه د ځمکو د تثبیت لړۍ پیل شوې او ډير ژر به د یادو ترمینلونو د جوړولو عملي چارې پيل شي.

د لوګر د والي ویاند صدیق احمدصدیقي رسنیو ته وویل چې د یادو پروژو اساسي هدف د ترانسپورټ د منظم سېسټم رامنځته کول، ولسي خلکو ته د تګ‌راتګ اسانتیاوې برابرول او په ولایت کې د دولتي خدمتونو د ساحې پراخول دي.

 د ده په وینا، د ترانسپورتي ترمینلونو جوړېدل نه یوازې د خلکو د ورځني ژوند اسانتیاوې ډېروي، بلکې د اقتصادي فعالیتونو په پراختیا کې هم مهم رول لري.

صدیقي زیاته کړه چې د ځمکو د تثبیت بهیر په خوښۍ ولسوالي کې په چټکۍ روان دی او د ترمینل جوړېدو لپاره ۱۶جریبه ځمکه د اړوندو ادارو ګډې تخنیکي کمېټې له‌خوا تثبیت شوې ده او دغه کمېټه د ولایت مقام، اراضي آمریت، د اوبو او انرژۍ ریاست، د کور او ښار جوړونې ریاست او د ترانسپورت آمریت استازولي پکې شاملې دي.

د نوموړي د معلوماتو له مخې، په خوښۍ ولسوالۍ کې د احصایې او معلوماتو ادارې لپاره د ودانۍ د جوړولو په هدف لس بیسوې ځمکه هم ځانګړې شوې ده، چې له جوړېدو سره به یې د دولتي ادارو د خدمتونو د وړاندې کولو کیفیت لا ښه شي.

د لوګر اوسېدونکي هم د حکومت له لوري په ولسوالیو کې د موټرو منظمو تم‌ځایونو جوړولو هرکلی کوي، خو ټينګار کوي چې دغه پلان لومړی باید په مرکز پل‌علم کې عملي شي او بیا ولسوالیو ته وغځول شي.