لوګر کې دوو ټرافیکي پېښو کې ۱۳ کسان ټپیان شوي.
د لوګر مرکز پل علم اړوند د «ګمبزې» سیمه کې د دوو موټرو ټکر کړی چې له امله یې ۱۲ کسان ټپیان شوي.
د لوګر د امنیې قومندانۍ ویاند مولوي سلطان محمد سنګین زینت رادیو ته وويل، دغه پېښه د فیلډر او سراچه موټرو ترمنځ شوې.
هغه وويل، ټپیان د درملنې لپاره روغتونونو ته لېږدول شوي.
ورته وخت کې د لوګر د محمدآغې ولسوالۍ اړوند «ذاهداباد» سیمه کې هم یوه جلا ټرافیکي پېښه شوې چې له امله یې یو کس ټپي شوی.
د امنیې قومندانۍ ویاند له ټولو موټر چلوونکو غوښتي چې له تېز سرعت او بېاحتیاطۍ څخه ډډه وکړي او ټرافیکي اصول په جدي ډول مراعت کړي، څو د ورته پېښو مخه ونیول شي.
چارواکي وایي، دې وروستیو کې د ټرافیکي پېښو ډېری لاملونه بېاحتیاطي، چټک سرعت او د اصولو نهمراعت کول دي.
