کندوز کې شاوخوا ۴زره راستنوشویو کورنیو ته ځمکې وېشل شوي.
د کندوز محلي مسوولان وايي چې له پاکستان، ایران، تاجکستان او ترکیې څخه راستنو شویو ته د ځمکو د وېش لړۍ پیل شوې او تراوسه له څلور زره څخه ډېرو کورنیو ته د هستوګنې نمرې ځانګړې شوې دي.
د کندوز د ښار جوړونې او کور جوړونې رییس مولوي محمدرمضان کلیم ویلي، دا ځمکې د چهاردرې ولسوالي د «خواجه کفتر» کډوال ښارګوټي کې وېشل شوې دي.
د نوموړي په وینا، ټاکل شوې چې په دې ښارګوټي کې پر درې زره جریبه ځمکه د پنځه زره هستوګنیزو نمرو جوړولو چارې بشپړې شي.
بل لور ته، یوشمې هغه راستانه شوي چې ځمکې یې ترلاسه کړي، د دې اقدام هرکلی کړی او له اړوندو ادارو یې غوښتي چې د کورونو د جوړولو په برخه کې لازیاتې مرستې ورسره وکړي.
مسوولان وایي، په دې ښارګوټي کې د جومات، ښوونځي، روغتون، ورزشي میدانونو او سوداګریزو بلاکونو جوړولو پلان هم په پام کې نیول شوی دی.
