زابل کې په ۷ میلیونه افغانیو د سړک د ترمیم پروژه پیل شوه.
د زابل اړوند د سیورې او شینکۍ ولسوالیو د لویې لارې د ترمیم او محافظتي چارو د یو لړ رسمي مراسمو په ترڅ کې پیل شوې.
په دې اړه جوړو شویو مراسمو کې د ولایت مقام د دفتر رییس مولوي قدرتالله بدري، د ټولکټو چارو رییس مولوي رحمتالله حسن، د عامې روغتیا رییس ډاکتر میرویس افغان او یوشمېر نورو مسوولانو ګډون کړی وو.
مسوولانو د پروژې د جزییاتو په اړه وویل چې د لويې لارې د ترمیم په چوکاټ کې به په ۴۴ مهمو نقطو کې د سړک د سر داغګیرۍ، د پلچکونو د کښیناستلو ستونزې او د سړک د تخریب شویو شولډرو د رغولو چارې ترسره شي.
همدارنګه به د لارې دواړو غاړو ته سنګکاري کېږي او د سیلابي اوبو د مهار لپاره به محافظوي چینلونه (جویچې) په سنګکاري ډول جوړېږي.
د پروژې ټول مالي بودیجه له ۷ میلیونو افغانیو څخه زیاته ده او د تطبیق قرارداد یې یو ودانیز شرکت ته سپارل شوی دی. د پروژې د بشپړېدو موده څلور میاشتې ټاکل شوې ده.
د مسوولانو په وینا، دغه پروژه به د لارې د خوندیتوب کچه لوړه کړي، د تګراتګ اسانتیاوې به پیاوړې کړي او د سیلابي زیانونو د کمېدو سبب به شي.
د پروژې له بشپړېدو سره به د سیمې خلک د سفر او ترانسپورټ په برخه کې له پام وړ اسانتیاوو برخمن شي.
د زابل د سوېلي ولسوالیو لویه لاره د ګڼو سیمو لپاره د اقتصادي، ټولنیزو او خدماتي فعالیتونو اساسي تګلاره ده.
د دې لارې د خرابېدو له امله خلک له ګڼو ستونزو سره مخ وو، په ځانګړي ډول د ژمي او باراني موسمونو پرمهال د تګراتګ ستونزې زیاتېدلې.
ځايي خلکو د دغې پروژې پیل د سیمې د پرمختګ لپاره مهم ګام بللی او هیله ښيي چې په ټاکلي وخت او ښه کیفیت سره بشپړه شي.
