د مالیې وزارت ویلي چې د روان کال لومړیو پنځو میاشتو کې د تېر کال د ورته مودې په پرتله صادراتو کې ۱۳.۵ سلنه او د ټرانزیټ په کچه کې ۲۴.۵ سلنه زیاتوالی راغلی.

دغه وزارت نن پنجشنبه یوه خبرپاڼه کې ویلي چې د هېواد په ګمرکونو کې د رامنځ ته شویو اسانتیاوو په دلیل، د روان ۱۴۰۴ کال لومړیو پنځو میاشتو کې د صادراتو او د هېواد له ګمرکونو بهر ته ټرانزیټ کې د پام وړ زیاتوالی راغلی.

خبرپاڼه کې ویل شوي چې د تېر ۱۴۰۳ کال لومړیو پنځو میاشتو کې ۴۳ زره او ۱۱۵ محمولې صادرات شوي، خو د روان ۱۴۰۴ کال لومړیو پنځو میاشتو کې ۴۸ زره او ۹۲۸ محمولې صادرات شوي چې په دې اساس، د تېر کال په پرتله ۱۳.۵ سلنه زیاتوالی ښيي.

د خبرپاڼې له مخې، د روان ۱۴۰۴ کال لومړیو پنځو میاشتو کې د بهرني ټرانزیټ په برخه کې ۱۳زره او ۱۹۸ محمولې ټرانزیټ شوي، خو تېر کال ورته موده کې ۱۰ زره او ۶۰۱ محمولې ټرانزیټ شوی چې ۲۴.۵ سلنه زیاتوالی ښيي.

د مالیې وزارت د مالوماتو پر اساس، تر ټولو ډېر صادرات پاکستان، هند، قزاقستان، متحده عربي امارات، اوزبیکستان او ترکیې ته شوي او ټرانزیټ هم پاکستان اوزبیکستان، ترکمنستان، تاجیکستان او ایران ته شوی دی.