د کونړ زلزله؛ څوکۍ ولسوالي کې ۳۳۰ زدهکوونکي او ښوونکي مړه او ټپیان شوي.
کونړ کې په ځانګړي ډول څوکۍ ولسوالي کې د شاوخوا دوه میاشتې وړاندې زلزلې د پوهنې سکتور ته پراخ زیانونه اړولي دي.
د کونړ د پوهنې ریاست مسوولان وایي چې دې طبیعي پېښې د څوکۍ ولسوالي له ۳۳۰ څخه ډېر زدهکوونکي او ښوونکي شهیدان او ټپیان کړي دي.
د کونړ د پوهنې ریاست مالي او اداري امر عزیزالرحمن پیوستون وايي: «په وروستۍ زلزله کې ۳۸ هلک زدهکوونکي او ۳۵ نجونې زدهکوونکې شهیدانې شوي او ۸۱ هلکان او ۸۰ نجونې ټپیانې شوي. د دې ترڅنګ، یو سر ښوونکی او ۱۲ نور ښوونکي او د پوهنې کارکوونکي هم زیانمن شوي.»
د پیوستون په وینا، زلزلې په دې ولسوالي کې ۲۵ ښوونځیو ته زیان اړولی چې ۸ بابه ښوونځي په بشپړ ډول ویجاړ شوي او ۱۷ نور ښوونځي یې په نسبي توګه زیانمن کړي دي.
د اسلامي تعلیماتو پروګرام کې ۱۵مدرسې په نیمه توګه زیانمن شوي، د ابرار موسسې ۱۷ بابه محلي ټولګي او ۸ بابه د کوار موسسې د امادهګۍ ټولګي په نیمه توګه وران شوي.
هغه زیاتوي چې د زدهکړې د دوام لپاره د پوهنې ریاست د «جلاله» موسسې په همکارۍ یې د زیانمنو ښوونځیو لپاره قرطاسیه او نور اړین توکي وېشلي.
همدارنګه، د ملګرو ملتونو د ماشومانو د ملاتړ صندوق یونیسف په همکارۍ څوکۍ ولسوالۍ کې ۹۵ نوي محلي ټولګي جوړ شوي.
«ښه خبر دا دی چې موږ د جلاله خیریه بنسټ په همکارۍ د هغو ۷۲ محلي ټولګیو لپاره چې قرطاسیه ورته اړتیا وه، قرطاسیه برابره کړې. همدارنګه، د یونیسف په همکارۍ مو په کونړ ولایت کې ۲۰۰ محلي ټولګي جوړ کړي چې ۹۵ یې څوکۍ ولسوالۍ کې دي.»
د پوهنې ریاست مسوولان وايي چې د زلزلې له درېیو ورځو وروسته، د یونیسف او یو شمېر کورنیو بنسټونو په مرسته، ښوونځي بېرته فعال شول او د زدهکوونکو لپاره درسونه پیل شول. دغو موقتي اقداماتو ښوونیز بهیر ته د زدهکوونکو بېرته راستنېدو زمینه برابره کړه.
د کونړ د پوهنې مسوولان ریاست ټینګار کوي چې د ویجاړو شوو ښوونځیو بشپړه بیارغونه او د نیمهویجاړ شوو ښوونځیو ترمیم د دوی په لومړیتوبونو کې دی.
د کونړ د پوهنې ریاست مالي او اداري آمر عزیزالرحمن پیوستون زیاتوي چې دې برخه کې د پوهنې وزارت سره خبرې روانې دي او هڅه کېږي چې اړینه بودیجه او ملاتړ را جلب شي.
همدارنګه، پلان شوی چې د موقتي خیمو او نویو ټولګیو په جوړولو سره، د ټولو زدهکوونکو لپاره د زدهکړې دوام یقیني شي او د تعلیم او تربیې بهیر کې خنډ رانه شي.
د مسوولانو په وینا، دامهال څوکۍ ولسوالۍ کې د ښوونځیو لپاره تر اوسه ۱۷۵ خیمې درول شوي، څو درسي بهیر په عادي ډول دوام وکړي.
ښاغلی پیوستون زیاتوي: «موږ د زلزلې له درېیو ورځو وروسته، د یونیسف او یو شمېر کورنیو موسسو په مرسته، درسونه پیل کړل. زموږ ټیم ته دنده سپارل شوې چې د ښوونځیو د تخریب کچه وڅېړي او ارزونه یې وکړي. دا موضوع د پوهنې وزارت سره هم شریکه شوې او د پوهنې ریاست ژمن دی چې اړوندې مسئلې تعقیب کړي او د ستونزو د حل لپاره هڅې وکړي.»
د کونړ د پوهنې ریاست مسوولان هیله څرګندوي چې د کورنیو او نړیوالو بنسټونو په همکارۍ، د ویجاړو شوو ښوونځیو د بیارغونې بهیر به په لنډ وخت کې بشپړ شي او د زدهکړو وضعیت به بېرته عادي حالت ته را وګرځي.
د یادونې ده چې د روان کال د سنبلې په نهمه شوې زلزلې د څوکۍ ولسوالۍ خلکو ته درانه مالي او ځاني زیانونه اړولي او د دغې ولسوالۍ ډېری اوسېدونکي لا هم په موقتي خیمو کې ژوند کوي.
سره له دې چې هڅې روانې دي، څو د زدهکړو د دوام لپاره مناسب چاپېریال برابر شي او د څوکۍ ولسوالۍ اوسېدونکي بېرته عادي ژوند ته ستانه شي.
