د لوګر د عامې روغتیا ریاست مسوولین وايي، د دغه ولایت په مرکز پلعلم او ولسوالیو کې د کوچیانو روغتیايي مرکزونو ته د ۱۱.۵ میلیون افغانیو په ارزښت ۸۳ قلمه بېلابېل درمل ووېشل شول.
د لوګر د عامې روغتیا رییس ډاکټر محمدزرک ځيرک د دغو درملو د وېش پروګرام د پرانیستې په مراسمو کې وویل، یاد درمل د څو نړۍوالو مرستهکوونکو بنسټونو په مالي ملاتړ او د عامې روغتیا وزارت له خوا برابر شوي چې نن یې رسمي وېش پیل شو.
ځيرک زیاته کړه چې د درملو دا مرسته به د کوچیانو د روغتیا برخه کې د موجودو ستونزو په هواري کې مهم رول ولوبوي.
نوموړي وویل، هڅې روانې دي چې د وزارت او نړۍوالو شریکانو په ملاتړ د کوچیانو روغتیايي خدمات نور هم پیاوړي شي او هغوی ته هر اړخیزه رسېدنه وشي.
بلخوا، د کوچیانو یوه استازي حاجي عبدالرحمن د عامې روغتیا له ریاسته مننه وکړه او د یادو درملو مرسته یې ارزښتمن ګام وباله.
نوموړي ټینګار وکړ چې اړینه ده د عامې روغتیا وزارت او نړۍوال بنسټونه وخت په وخت د کوچیانو روغتیايي مرکزونه فعالیتونه وارزوي او د موجودو ستونزو د حل لپاره یې عملي ګامونه پورته کړي.
