د لوګر ولایت کرنې او مالدارۍ ریاست مسوولین وایي، د یوې ځانګړې کمېټې له لوري د کرنې او مالدارۍ ریاست تر چتر لاندې ۱۲۰۰ راستانه شویو کډوالو کورنیو ته د خوراکي او نغدي مرستو د وېش لړۍ پیل کړې.

د چارواکو په وینا، هرې مستحقې کورنۍ ته ۲۵۰ کیلوګرامه غنم او پنځه زره افغانۍ نغدې مرسته ورکول کېږي.

د لوګر د کرنې او مالدارۍ ریاست رئیس مولوي شیرآقا پیر حبیب الرحمن وویل، یاده مرسته د هغو راستانه شویو کډوالو کورنیو لپاره ځانګړې شوې چې وروستیو کې خپلو اصلي مېنو ته ستنې شوې دي. د هغه په خبره، د مرستو د وېش بهیر د شفافیت په پام کې نیولو سره د ټاکل شوې کمېټې له لوري ترسره کېږي.

بلخوا، د لوګر د ولایت مرستیال والي مولوي محمد انور دین پرور وویل، دا مرستې د امیرالمؤمنین د شفقت څرګندونه ده او ټینګار یې وکړ چې د هېواد په لرې پرتو سیمو کې مېشت او راستانه شوي کډوال نه دي هېر شوي. نوموړي له یادو کورنیو وغوښتل چې د نظام د پیاوړتیا او ثبات لپاره په اخلاص دعا وکړي.

ځايي مسوولین وایي، هڅه کوي چې د مرستو دغه لړۍ په منظم او عادلانه ډول تر ټولو مستحقو کورنیو ورسوي.

بلخوا اړې او بې وزله کورنۍ هم خوښې دي چې د دولت له لوري ورسره د خوراکي او نغدو پيسو مرسته وشوه، خو ټینګار کوي چې دغه مرستې دې په دوامداره توګه په بې وزله او اړو کورنیو ووېشل شي.