له کندهار څخه بهر ته د انځرو صادرات دوه برابره شوي.
د کندهار کرنې ریاست د معلوماتو له مخې، په ۱۴۰۴کال کې له دغه ولایت څخه ۲۹زره او ۷۸۴ ټنه انځر بهرنیو بازارونو ته صادر شوي دي.
دا په داسې حال کې ده چې تېرکال یوازې ۱۳زره او ۲۰۶ ټنه انځر صادر شوي وو. د دې شمیرو له مخې، سږکال د انځرو صادرات ۱۶زره او ۵۷۸ ټنه زیات شوي دي.
د کندهار د کرنې ریاست ویاند محمد حنیف حقمل وايي: «یاد صادرات د کندهار د کرنې ریاست، د سوداګرۍ او پانګونې خونې په همغږۍ او د افغان ملي سوداګرو په مالي ملاتړ ترسره سوي دي، چې دا کندهاري بڼوالو او سوداګرو لپاره یو ښه اقتصادي زیری دی.»
نوموړی زیاتوي چې د انځرو صادرات د متحده عربي اماراتو، هند، انګلستان، پاکستان، چین، کاناډا، نیپال، المان او سعودي عربستان په ګډون ګڼو هېوادونو ته شوي دي.
د حقمل په وینا، د ا.ا مسوولان هڅه کوي چې د هېواد د صادراتو کچه لوړه او د وارداتو انحصار راکم کړي.
د کندهار د انځرو یوشمېر بڼوال وايي، سږکال د نړیوالو بازارونو غوښتنې زیاتې شوي او د لېږد او صادراتو اسانۍ، د دوی عاید ډېر کړی دی.
یو بڼوال، حاجي محمد وايي: «موږ سږ کال د خپل محصول ښه بیې ولیدې. که حکومت د زېرمتونونو او بسته بندۍ په برخه کې نورې اسانتیاوې برابرې کړي، موږ کولای شو څو چنده نور صادرات هم وکړو.»
د بڼوالو د نظر له مخې، د انځرو د کیفیت ښه والی، د پروسس ابتدايي مراکزو فعالېدل او د کرنې ریاست همغږي د سږني پرمختګ اصلي عوامل بلل کېږي.
د کندهار یو بل بڼوال شاه حسن هم وايي: «سږکال دکرني ریاست دهڅو تر څنګ دبڼوالو همږغۍ له کرني ریاست سره زیاته وه ، موږ سږ کال د نورو کلونو په توپیر ښه ګټه وټه کړې.»
د سوداګریزو چاروکارپوه عبدالله شېرزاد بیا سلاموطندار ته وایي: «کندهار د انځرو په نړیوال مارکېټ کې ځانګړی ځای لري، خو تر ټولو مهمه دا ده چې د صادراتو د لوړېدو تر شا یوه منظمه تګلاره رامنځته شوې ده. که زېرمهسازي، معياري بستهبندي او د هوايي دهلېز پراختیا لا زیاته شي، نو افغانستان کولای شي په څو کلونو کې د منځنۍ اسیا د وچو میوو په بازار کې مخکښ ځای ونیسي.»
له کندهار څخه د انځرو د صادراتو د پام وړ زیاتوالی د دې ولایت د اقتصاد د غوړېدو یو تازه نښه ده.
په داسې حال کې چې د بڼوالو عواید لوړېږي، کارپوهان ټینګار کوي چې د زېرمتونونو جوړول، عصري بستهبندي او منظم صادراتي تګلاره د افغانستان د وچو مېوو نړیوال نوم لا پیاوړی کولای شي.
د سږکال د صادراتو مثبتې شمېرې ښيي، که موجودې هلې ځلې دوام وکړي، کندهار کولای شي د انځرو په نړیوال مارکېټ کې ستره ونډه ولري.
