سږکال له کندهار بهر ته نږدې ۲۲زره ټُنه انار صادر شوي.
په داسې حال کې چې د کندهار فصلونه د هېواد په اقتصادي صادراتو کې مهم رول لري، سږکال د انارو صادرات د پام وړ لوړ شوي او ۲۲زره ټنو ته رسېدلي دي.
چارواکي دغه زیاتوالی د همغږۍ، پانګونې زیاتېدو او نویو بازارونو ته د صادراتو د پراخېدو پایله بولي، خو بڼوال او سوداګر وایي چې لاهم د بستهبندۍ او ترانسپورت په برخه کې د دولت پراخ ملاتړ ته اړتیا لري.
د کندهار د کرنې، اوبولګولو او مالدارۍ ریاست د معلوماتو له مخې، د ۱۴۰۴کال راهیسې تر دې دمه له کندهار څخه بهرنیو هېوادونو ته ۲۱زره او ۸۷۰ ټنه انار صادر شوي چې دا شمېر د تېرکال په پرتله د پام وړ زیاتوالی ښيي.
تېرکال یوازې شاوخوا ۷زره ټنه انار صادر شوي وو، خو سږکال د صادراتو کچه نږدې ۱۵زره ټنه لوړه شوې ده. د کندهار د کرنې ریاست ویاند محمدحنیف حقمل وایي چې دا پرمختګ د څو اړخیزو همغږیو او هڅو نتیجه ده.
نوموړي وویل: «سږ کال صادرات د کرنې ریاست، د سوداګرۍ او پانګونې خونې او ملي سوداګرو په ګډو هڅو ترسره شوي دي. زموږ ډېری انار مالیزیا، روسیې، پاکستان، ازبکستان او فدراسیون ته صادر شوي دي.»
سوداګر د انارو د زیاتوالي هرکلی کوي او وایي چې نړیوال بازارونه د کندهار د انارو د کیفیت ستاینه کوي. سوداګر عبدالجبار ثابت وویل: «کندهاري انار نړیوال شهرت لري. سږ کال د بازار غوښتنې ډېرې شوې دي، خو که د لوجستیک او بستهبندۍ برخه نوره هم معیاري شي، د صادراتو کچه څو چنده لوړېږي.»
بڼوال هم د سږني فصل د ښه عاید له امله خوښ ښکاري، خو خپلې اندېښنې هم لري. د ژیړۍ ولسوالۍ یو بڼوال محمد نبي وایي: «موږ خوشاله یو چې سږ کال انار په ښه قیمت وپلورل شول، خو ترانسپورتي اسانتیاوې او یخچالي ذخیرې لږې دي. که حکومت دا ستونزې حل کړي، زموږ حاصل به لا ډېر ارزښت ومومي.»
کرنیز شنونکی انجینیر محبالله سروري وایي چې د انارو صادراتو زیاتوالی د هېواد په اقتصاد مستقیم اغېز لري، خو باید د کیفیت ساتنه، برانډ جوړونه او مارکېټنګ رسمي لارې ولري.
نوموړي زیاته کړه: «کندهار د نړۍ په کچه د انارو د کیفیت یو مهم مرکز دی. که د معیاري سړو خونو، کنټرول شوې تودوخې کانتینرونو او نړیوال تصدیقلیکونو لپاره سرمایهګذاري وشي، افغانستان کولای شي د انارو په نړیوال بازار کې ثابت حضور ولري.»
سږنی زیاتوالی د هېواد د صادراتي اقتصاد لپاره ښه نښه بلل کېږي، خو د بڼوالو او سوداګرو ګډه غوښتنه دا ده چې دولت دې د بستهبندۍ، لوجستیک، فابریکو او ټولې اکمالاتي زنځیر د پیاوړتیا لپاره نورې پانګونې او اسانتیاوې برابرې کړي.
که یادې ستونزې حل شي، کندهار کولای شي په راتلونکو کلونو کې د انارو د تولید او صادراتو په نړیواله کچه یو له مهمو مرکزونو څخه پاتې شي.
