یونېسف په زابل کې ۴۷ روغتیايي مرکزونو ته طبي وسایل ورکړي.
د عامې روغتیا مسوولان وايي چې د یونېسف په همکاري د تطبیق کوونکې موسسې (MOVE) له لوري په مرکز کلات او ولسوالیو کې پر ۴۷ روغتیايي مرکزونو طبي او خدماتي وسایل وېشل کېږي.
د زابل د عامې روغتیا رییس ډاکټر میرویس افغان د مرستو له ترلاسه کولو خوښي څرګنده کړه او ویې ویل: «یاده مرسته د ناروغانو د درملنې په ښهوالي او د روغتیايي مرکزونو د خدماتي معیار په لوړولو کې مهم رول لري. موږ هڅه کوو چې نور روغتیايي مرکزونه هم فعال کړو، څو خلکو ته غوره روغتیایي سهولتونه برابر شي.»
همدارنګه، د MOVE ولایتي مسوول ډاکټر محمدنادر رحماني وویل: «دا وسایل د یونېسف له لوري برابر شوي او د ۴۷ روغتیايي مرکزونو لپاره ځانګړي شوي دي. موږ له وړاندې د دغو مرکزونو اړتیاوې ارزولې وې او دغه مرسته د هماغو اړتیاوو پر بنسټ برابره شوې ده.»
د قلات ښار یو اوسېدونکی حاجي عبدالله، د یادو مرستو هرکلی کوي او زیاتوي: «پخوا کله نا کله د وسایلو کمښت و، او خلک به له ستونزو سره مخ وو، خو هیله لرو چې له دې مرستو وروسته خلکو ته درملنه له نږدې مرکزونو ممکنه شي.»
بلخوا د شهر صفا ولسوالي یو روغتیايي کارکوونکی چې نه یې غوښتل نوم یې واخیستل شي، وویل: «د وسایلو کمښت زموږ د خدماتو پر کیفیت اغېز درلود، خو اوس به د ناروغانو د درملنې بهیر ډېر اسانه او اغېزناک شي.»
په زابل کې له دې وړاندې هم د یونېسف او نورو خیریه بنسټونو له لوري د روغتیايي مرستو لړۍ روانه وه. د عامې روغتیا ریاست چارواکي وايي، د دغو مرستو دوام به په ولایت کې د عامې روغتیا د خدمتونو کیفیت لا لوړ کړي.
