د کندهار په نېش ولسوالۍ کې د کرنې د پیاوړتیا، د اوبو مدیریت او د سېلابونو د مخنیوي په موخه د ۲۸۲ زره امریکایي ډالرو په ارزښت د یوه ستر چکډېم جوړولو چارې پیل شوې.
د کندهار مسوولانو نن (پنجشنبه، جدي ۲۵) وویل، دغه پروژه د کندهار د کرنې، اوبو لګولو او مالدارۍ ریاست په هڅو، د ملګرو ملتونو د کرنې او خوراک نړیوال سازمان FAO په مالي ملاتړ د نېش ولسوالۍ “باغآغا ” سیمه کې عملي کېږي.
یاد چکډیم د باراني اوبو د مهار او اغېزمنې استفادې لپاره جوړېږي، څو د سیمې کرنیزې ځمکې له اوبو برخمنې کړي.
د کرنې وزارت د طبیعي سرچینو معینیت استازي مولوی عبدالله جان احرار د دغې پروژې اهمیت ته په اشارې وویل:
«د چکډیمونو جوړول د هېواد په کچه د اوبو د مدیریت لپاره یو بنسټیز ګام دی او دا ډول پروژې به د اقلیمي بدلونونو منفي اغېزې تر ډېره راکمې کړي.»
د کندهار د کرنې، اوبو لګولو او مالدارۍ ریاست ویاند محمد حنیف حقمل وویل، دغه پروژه چې اوږدوالی یې په سر کې ۱۴۳ متره، په پای کې ۸۰ متره او لوړوالی به یې ۹ متره وي، د نهو میاشتو په موده کې بشپړیږي.
نوموړي د پروژې د ګټو او ټولنیز اغېز په اړه وویل، دا چکډیم به د کرنې او کاري فرصتونو په برخه کې مهم رول ولوبوي.
«یاد چکډیم به د ۱۵۰ زره متره مکعب اوبو د ذخیرې ظرفیت ولري، ۳۶۰ هکټاره ځمکه به خړوبه کړي او ۳۵۴۳ بزګر به ترې مستقیمه ګټه واخلي، د تطبیق پر مهال به یې سلګونو کسانو ته د کار زمینه برابره شي.»
په همدې حال کې، د سیمې بزګران او مالداران د دغې پروژې له پیل څخه خوښ دي او دا د خپلو ستونزو د حل لپاره یو مهم ګام بولي.
بزګر او مالدار محمد اعظم او سردار حسین وايي: «دا چکډیم به زموږ د اوبو ستونزه تر ډېره حل کړي او کرنه به مو پیاوړې کړي.»
«د باراني اوبو مهار به د وچکالۍ پر وړاندې زموږ مرسته وکړي او د ځمکې لاندې اوبه به هم ورسره لوړې شي.»
د یادونې ده چې د کندهار د کرنې ریاست له دې وړاندې هم په بېلابېلو لېرې پرتو ولسوالیو کې د باراني اوبو د مهار لپاره ورته چکډیمونه جوړ کړي او دامهال هم په یو شمېر نورو سیمو کې ورته پراختیايي پروژې روانې دي.
