لوګر کې ۵۰۰ بزګرانو ته اصلاحشوی تخم او کیمیاوي سرې ووېشل شوې.
د لوګر د کرنې، اوبولګولو او مالدارۍ ریاست مسوولان وایي چې د قطر هېواد د «سرې میاشتې ټولنې» په مالي ملاتړ، په خوښۍ ولسوالي کې ۵۰۰ مستحقو بزګرانو ته اصلاحشوی د غنمو تخم او کیمیاوي سرې ووېشل شوې.
د لوګر والي ویاند صدیق احمدصدیقي سلاموطندار ته وویل، د یادې پروژې له مخې، هر بزګر ته ۵۰ کیلوګرامه اصلاحشوی د غنمو تخم، ۵۰ کیلوګرامه سپینې کیمیاوي سرې او ۵۰ کیلوګرامه تورې کیمیاوي سرې ورکړل شوې، څو کرنیز حاصلات زیات او د ځمکو د حاصلخېزۍ کچه لوړه شي.
نوموړي وویل، دا مرسته د بزګرانو لپاره مهم اقتصادي ارزښت لري او زیاته یې کړه چې د پروژې د شفاف تطبیق لپاره به له ټولو همکارو بنسټونو سره هر اړخیزه همکاري روانه وساتل شي.
ورته مهال، د خوښۍ ولسوالي بزګرانو د مرستندویو بنسټونو لهخوا د ورته کرنیزو پروژو د دوام غوښتنه وکړه، څو د دوی اقتصادي وضعیت لا پیاوړی شي.
