پکتيا کې له جګړې بېځايه شويو کورنيو سره مرستې وشوې.
د پکتيا ډنډپټان او څمکنيو ولسواليو څخه له پاکستان د وروستی جګړې له امله بېځايه شويو کورنيو سره د خيمو، نغدي او نورو توکو مرستې شوي دي.
د پکتيا پېښو پر وړاندې مبارزې ادارې رییس مولوي نثاراحمد نجات وايي چې احمدخيلو ولسوالي کې نن دوشنبه، وري ۲۴مه، په هغه ۷۷۳ کورنيو چې د پاکستان د وروستيو جګړو له امله له ډنډپټان او څمکنيو ولسوالي څخه بېځايه شوي وو، د مرستندويه بنسټونو له لوري ورسره مرستې شوې دي.
هغه وويل چې په ياده مرسته کې هرې کورنی ته د خوړونو نړيوال پرګرام لهخوا ۵۸۰۰ افغانی او د يونېسف لهخوا يو د اشپزخانې کیټ ورکړل شوی او همداراز د يواينايچسيار لهخوا بيا سل بېځايه شويو کورنيو ته خيمې هم ورکړل شوي دي.
نوموړي زیاته کړه چې تراوسه يې د جګړې له امله بېځايه شويو ۲۵۰۰ کورنيو سروې کړې، خو په خبره يې چې لاهم ډېری بېځايه شوې کورنی پاتې هم دي.
عبدالغني چې له ډنډپټان ولسوالي څخه د جګړې له امله احمدخيلو ولسوالي ته بې ځايه شوی او مرسته يې تر لاسه کړې وه وويل چې حکومت او مرستندویه بنسټونه دې د جګړې له امله ويجاړو شويو کورونو او کاروبارونو برابرولو برخه کې ورسره مرستې وکړي.
يوشمېر بېځايه شويو کورنيو چې مرستې يې ترلاسه کړې وې خوښي څرګندوي، خو وايي چې د پاکستان لهخوا يې د جګړې پرمهال کورونه، کور توکي، څاروي او کاروبارونه لهمنځه تللي دي.
