ملګري ملتونه: افغان سرپرستې مېرمنې د اړتیاوو برابرولو کې له ستونزو سره مخ دي.
د ملګروملتونو پراختیايي پروګرام وایي چې د افغانستان په ځینو ولسوالیو کې د ښځینه سرپرستو کورنیو شمېر تر پام وړ زیات شوی او اوس تر ۲۶سلنې کورنیو، ښځې مشري کوي.
دغه ادارې نن یکشنبه، د لیندۍ ۹مه / د نومبر ۳۰مه پر خپله ایکسپاڼه لیکلي چې د دې کورنیو ښځو څخه یوازې ۶سلنه د کار په بازار کې ونډه لري او کولای شي عایداتي فعالیتونه ترسره کړي.
د ملګروملتونو د پراختیايي پروګرام په وینا، د ښځو تر مشرۍ لاندې کورنۍ د عاید، سرپناه او بنسټیزو خدماتو په ترلاسه کولو کې له سترو ستونزو سره مخ دي.
تر دې مخکې د خوړو نړيوال پروګرام هم راپور ورکړی و چې په افغانستان کې ښځې او ماشومان د فقر تر ټولو دروند بار پر اوږو وړي.
د ملګروملتونو د شته معلوماتو پر بنسټ، په افغانستان کې له ۲۲ میلیونو څخه ډېر خلک د بشري مرستو اړتيا لري، خو د دې مرستو د برابرولو لپاره اړوند ادارې له سخت مالي کمښت سره مخ دي.
بل لور ته، د اسلامي امارت د اقتصاد وزارت وایي چې د فقر د راکمولو لپاره يې لنډمهاله او اوږدمهاله پروګرامونه طرحه کړي دي. دغه وزارت وایي که څه هم نړيوالې مرستې په لنډمهال کې ضروري دي، خو باید د زېربناوو په پراختیا او د کاري فرصتونو په رامنځته کولو ډېر تمرکز وشي.
