د لوګر په محمداغې ولسوالي کې د ښاروالي په هڅو د څارویو د حلالې لپاره یو معیاري مسلخ جوړ او ګټې‌اخیستنې ته سپارل شوی دی.

د لوګر د والي ویاند صدیق احمدصدیقي زینت رادیو ته وویل، دغه مسلخ د ۵۰۰ متره مربع ځمکې پر سر د اجمل په نوم د سیمې د یوه اوسېدونکي له لوري جوړ شوی دی.

نوموړي زیاته کړه چې د یادې پروژې ټول لګښت شاوخوا ۵۰۰ زره افغانۍ دی، په یو وخت کې د ۶۰ څارویو د ساتلو ظرفیت لري او د پل قندهاري، زاهداباد او واغجان بازارونو شاوخوا ۲۵ قصابان به ترې استفاده کوي.

د مسوولانو په وینا، د دې مسلخ د جوړېدو موخه د ناروغو حیواناتو له غیرمعیاري حلالېدو مخنیوی، د عامې روغتیا ساتنه، او د ټولنې له بېلابېلو ناروغیو څخه وقایه ده.