کندهار څخه ۲.۵ ټنه شات بهر ته صادر شوي.
د کندهار د کرنې، اوبو لګولو او مالدارۍ ریاست مسوولان وايي، روان کال له دغه ولایت څخه ۲.۵ ټنه شات نورو هېوادونو ته صادر شوي.
د کندهار د کرنې ریاست د مالدارۍ امریت متخصص عبدالوارث حقمل وویل، یاد شات د خصوصي شرکتونو له لوري ترکیې، عمان، متحده عربي اماراتو، ایران او یو شمېر نورو هېوادونو ته صادر شوي.
نوموړی زیاتوي چې د کندهار د ریحان شات په نړیوالو بازارونو کې ځانګړی نوم لري او بهرني پېرېدونکي یې د اخیستلو لپاره زیاته لېوالتیا ښيي.
د یادونې ده چې روان کال کندهار کې د ریحانو په کرنه او د ریحاني شاتو په تولید کې نږدې ۲۵ سلنه زیاتوالی راغلی چې له همدې امله د شاتو صادراتو ته هم زمینه برابره شوې او یاد اندازه شات بهرنیو هېوادونو ته صادر شوي دي.
