لوګر کې د کرکټ پسرلي جام سیالۍ د «سفېدسنګ» لوبډلې په بریا پای ته ورسېدې.
د لوګر کرکټ امریت مسؤولین وایي چې د دغه ولایت په محمداغې ولسوالۍ کې د ولایت په کچه د لس لوبډلو ترمنځ د کرکټ شل اووریزې سیالۍ د «سفېدسنګ» کرکټ لوبډلې په اتلولۍ پای ته ورسېدې.
د دغه ولایت د کرکټ امریت امر حشمتالله ستانکزي رسنیو ته وویل، د کرکټ دغه شل اووریزې رسمي سیالۍ دوه اونۍ مخکې د لوګر ولایت د کرکټ امریت له لوري د «پسرلي جام» په نوم پیل شوې وي چې نن پای ته ورسېدې.
هغه زیاته کړه، د یادو سیالیو پای لوبې ته د سفېدسنګ او فلاح کرکټ لوبډلو لاره موندلې وه چې سفېدسنګ کرکټ لوبډلې وکولای شول خپلې سیالۍ لوبډلې ته د پنځو منډو په توپیر ماته ورکړي او د پسرلي جام اتلولي په خپل نوم کړي.
نوموړي زیاته کړه، له یادو سیالیو جوړېدو څخه موخه د لوګر ولایت په کچه کرکټ ورزش ته وده ورکول، د ورزشکارانو ترمنځ د تجربو شریکول او همغږۍ رامنځته کول وو.
ده وویل، هڅه کوي چې ورته سیالۍ د لوګر ولایت په مرکز پلعلم او ولسوالیو کې هم جوړې کړي.
بلخوا، د یادو سیالیو یوه لوبغاړي احمدخان وویل ، دا ډول سیالۍ کولای شي چې د ورزشکارانو ترمنځ ښې اړیکې رامنځته کړي او د ورزشکارانو ظرفیت کچه لوړه کړي.
هغه د لوګر کرکټ امریت څخه وغوښتل چې د ورزشکارانو د ظرفیت لوړونې تر څنګ، د معیاري میدانونو او تجهیزاتو برابرولو لپاره هم هڅې زیاتې کړي.
