کندهار کې له ۷۶۳ بزګرانو سره مرسته شوې.
د کندهار په درېوو ولسوالیو کې د کرنې، اوبولګولو او مالدارۍ ریاست په هڅو، د ملګروملتونو د نشهيي توکو او جرمونو پروړاندې د مبارزې نړیوال سازمان (UNODC) په مالي ملاتړ او د هالنډ کمېټې په تخنیکي همکارۍ، ۷۶۳ بزګرانو ته د غنمو اصلاح شوي تخمونه او کیمیاوي سرې وویشل شوې.
د کرنې ریاست چارواکي وايي، دا مرسته د بزګرانو د اقتصادي پیاوړتیا او د کرنې د معیاري کولو په هدف شوې، څو بزګران د اصلاح شویو تخمونو له لارې د ښو حاصلاتو تجربه وکړي.
د کرنې ریاست ویاند محمدحنیف حقمل وویل: «موږ غواړو د اصلاح شوو تخمونو له لارې د کرنې کیفیت لوړ او د بزګرانو حاصل زیات کړو. دا پروګرام د هغو بزګرانو لپاره دی چې واقعي اړتیا لري او د روزنې له لارې نوي میتودونه زده کړي دي.»
د یادې مرستې له مخې، هر بزګر ته ۵۰ کیلوګرامه د غنمو اصلاح شویو تخم، ۵۰ کیلو توره سره، ۵۰ کیلو سپینه سره، یوه بیلچه او د قطاري کرنې لپاره یوه رجه ورکړل شوې ده.
له دې مرستې څخه ۳۲۲ کسان د خاکرېز، ۲۵۰ کسان د ارغستان او ۱۹۰ کسان د غورک ولسوالي بزګران برخمن شوي دي.
د مرستې د شفاف وېش لپاره یوه ګډه کمېټه جوړه شوې وه چې د نوملیکنې او ارزونې له پړاو وروستهیې دا توکي وویشل.
د هالنډ کمېټې مسوول انجینیر محمدسلیم پوپل وویل: «دغه تخمونه د ننداریزو کروندو لپاره ورکړل شوي دي. بزګران به د یوې جریب ځمکې په سطحه پر ۱۰۰۰ متره مربع ځمکه په قطاري ډول او پر ۳۰۰۰ متره مربع ځمکه په پاشلي ډول کرنه کوي، څو د دواړو طریقو پایلې پرتله کړي.»
هغه زیاته کړه، د بزګرانو لپاره د روزنې ځانګړي پروګرامونه هم جوړ شوي وو چې پهکې د تخم کرنې، د سرې کارونې، اوبولګولو او د نوي میتودونو په اړه عملي زدهکړې ورکړل شوې.
د مرستې ترلاسه کوونکي بزګران وايي، دا ډول پروژې د هغوی ژوند ته مثبت بدلون راولي او د کرنې د کیفیت په لوړولو کې مرسته کوي.
د غورک ولسوالۍ یو بزګر عبدالغفور وویل: «پخوا مو زاړه تخمونه کارول، حاصلات کم وو، خو اوس چې دا اصلاح شوي تخمونه ترلاسه کړل، هیله لرو چې حاصل مو زیات شي او اقتصاد مو ښه شي.»
بل بزګر عبدالمجید وویل: «د روزنې پروګرام ډېر ګټور وو. موږ اوس پوهېږو چې څنګه د سرې او اوبو اندازه سم مدیریت کړو، دا مرسته زموږ لپاره یو عملي ښوونځی دی.»
د کرنې ریاست چارواکي وایي، د دې پروګرام موخه د اصلاح شویو تخمونو ترویج، د نوې کرنیزې ټکنالوژۍ معرفي او د بزګرانو اقتصادي وضعیت ښه کول دي.
یاده دې وي چې یوه اوونۍ وړاندې هم د کرنې وزارت په مالي ملاتړ او د کندهار کرنې ریاست په تخنیکي همکارۍ، ۳۰ بزګرانو ته د ننداریزو کروندو په موخه ورته مرستې ورکړل شوې وې، څو د قطاري کرنې طریقه وازمويي او پایلې یې د کرنې ریاست سره شريکې کړي.
