هرات کې د کمپیوټري نسخو د لیکلو بهیر پیل شو.
په هرات کې چارواکي وايي چې د حکومت د مشرتابه د فرمان له مخې، په دې ولایت کې د روغتیايي مرکزونو د کمپیوټري نسخې لیکلو بهیر پیل شوی دی.
د هرات د عامې روغتیا د نظارت او ارزونې امریت غړی، خانمحمد تیموري وايي چې دا ګام د هغو ستونزو د حل لپاره اخیستل شوی چې د لاسي او نه لوستلکېدونکو نسخو له امله رامنځته کېدې.
د هغه په وینا، ټاکل شوې چې دا بهیر به په تدریجي ډول د هرات په ښار او ولسوالیو کې د ټولو روغتیايي مرکزونو تر کچې پلی شي.
تیموري زیاتوي چې د کمپیوټري نسخو کارول رسمي ډول پیل شوی او تمه کېږي چې دا نوې پروسه به په هرات کې د نسخې لیکلو دودیزه طریقه بدله کړي.
له دې وړاندې د هېواد په ځینو نورو ولایتونو کې هم خلکو د قلمي نسخو پر ځای د کمپیوټري نسخو د دودولو غوښتنه کړې او چارواکو هم د کمپیوټري نسخو د لیکلو او دودولو ژمنه کړې ده.
