هلمند کې شپږ ښوونیزې ودانۍ ګټېاخیستنې ته وسپارل شوې.
هلمند کې د یونېسف په مالي مرسته د څه باندې پنځوس میلیونه افغانیو په ارزښت شپږ نوې ښوونیزې ودانۍ جوړې او د پوهني ریاست له لوري ګټېاخیستنې ته وسپارل شوې. دغه ښوونځي د مارجه، خانشین، نادعلي، ګرشک، باباجي او نهرسراج ولسوالیو کې جوړې شوې دي.
د هلمند د پوهني ریاست او د یونېسف نړیوال سازمان ترمنځ د ښوونیزو خدمتونو د پراختیا او د زدهکړې ته د ماشومانو د لازیات لاسرسي په موخه ګډه همکاري روانه ده.
د دې همکاري په لړ کې تېره ورځ شپږ نوي ښوونځي ګټېاخیستنې ته وسپارل شوې او ټاکل شوې چې په نږدې راتلونکې کې په ګرمسېر او ناوه ولسوالیو کې هم دوه نور ښوونځي پرانیستل شي.
د مارجې ولسوالي د پرانیستې مراسمو ته د پوهني رییس مولوي محمدعوض انصاري، د عمومي زدهکړو امر، دیني علماوو، قومي مشرانو او سلګونو زدهکوونکو ګډون کړی وو.
مولوي انصاري وویل: «دغه ښوونځي نه یوازې د زده کړې د ودې سبب ګرځي، بلکې د ټولنې د ثبات او روڼ سبا لپاره هم بنسټیز ارزښت لري.»
هغه د یونېسف له دوامدارو مرستو او د بشري مرستې ټولنې له تخنیکي همکارۍ مننه وکړه او له سیمهییزو مسوولانو یې وغوښتل چې د ودانیو په ساتنه او د زدهکړو په پیاوړتیا کې فعاله ونډه واخلي.
دغه ښوونځي د څه باندې ۵۰،۴۴۹،۷۵۲ افغانیو په مالي لګښت جوړ شوي چې د تمویل چارې یې یونېسف پر غاړه اخیستي او عملي کار یې د بشري مرستې ټولنې په همغږۍ له پوهني ریاست سره کړی دی.
د سیمې اوسېدونکو هم له دولت او یونېسف څخه د ښوونیزو بنسټونو د جوړوني او بیا رغونې له امله خوښي څرګنده کړه. د مارجې ولسوالۍ یو مشر، حاجي سلیم، وویل: «موږ خوښ یو چې زموږ د ماشومانو لپاره مناسب تعلیمي چاپېریال برابر شو. هیله لرو دا ډول پروژې دوام ومومي.»
محمدیونیس هم وویل: «دا ودانۍ د عصري معیارونو مطابق جوړې شوې، زده کوونکو ته به پاکې اوبه، تشنابونه او نور ضروري اسانتیاوې پکې برابر سوي دي.»
د هلمند په شمالي ولسوالیو کې نږدې یوه میاشت وړاندې هم ۱۱ بابه ښوونځي ګټېاخیستنې ته سپارل شوي وو. د پوهني ریاست د معلوماتو له مخې، د یونېسف د دوامدارو مرستو په مټ به د ولایت په نورو سیمو کې هم د ښوونځیو د جوړېدو او ترمیم لړۍ روانه وي، څو ټولو ماشومانو ته د زده کړې مساوي فرصتونه برابر شي.
