وزارت مالیه: معاش کارمندان دولتی در هفته‌ی روان اجرا می‌شود.
وزارت مالیه‌ی حکومت سرپرست افغانستان، امروز (سه‌شنبه، ۲۸ حوت) با پخش اطلاعیه‌ای از پرداخت معاش کارمندان دولتی در هفته‌ی روان اطمینان داده است.
این وزارت، گفته که «فهرست‌ها و شایعه‌های پخش‌شده در رسانه‌ها و شبکه‌های اجتماعی در باره‌ی تغییر نورم معاش‌ها به گونه‌ی مطلق نادرست است.»
وزارت مالیه، افزوده است که اطمینان می‌دهد حقوق کارمندان اداره‌های دولتی در این هفته مانند گذشته پرداخت خواهد شد.
این در حالی است که دو روز تا پایان سال مالی مانده است و کارمندان اداره‌های دولتی در افغانستان، معاش ماه‌های دلو و حوت خود را هنوز دریافت نکرده اند.
تأخیر در پرداخت معاش کارمندان اداره‌های دولتی در افغانستان، سبب نگرانی بسیاری از این کارمندان شده است.
گفتنی است که معاش ماه جدی کارمندان اداره‌های دولتی نیز با تأخیر اجرا شده بود.
