وزارت معادن و پترولیم حکومت سرپرست، می‌گوید که سرمایه‌گذاران روسی در دیدار با حسام‌الدین صابری، معین مالی و اداری این وزارت، فرصت‌های سرمایه‌گذاری در افغانستان را مناسب خوانده اند.

در اعلامیه‌ی وزارت معادن و پترولیم، آمده که سرمایه‌گذاران روسی خواستار هم‌کاری وزارت برای سرمایه‌گذاری روی معادن طلا و مس شده و به ایجاد لابراتواری معیاری و مجهز و ارتقای ظرفیت کارمندان این وزارت وعده سپرده اند.

صابری، گفته است که همه سرمایه‌گذاران خارجی می‌توانند با بررسی شرط‌نامه‌ی وزارت، پروپوزل‌های شان را به منظور سرمایه‌گذاری روی معادن افغانستان با این وزارت شریک کنند.

معین مالی و اداری وزارت معادن، از هم‌کاری‌های قانونی در بخش استخراج معدن به سرمایه‌گذاران اطمینان داده است.

در بیش‌تر از سه سال گذشته، شرکت‌های خارجی زیادی از چین، اوزبیکستان و ترکیه روی منابع طبیعی افغانستان سرمایه‌گذاری کرده اند.